याचा अर्थ तुम्ही जगायला शिकताय... हळूहळू...!

याचा अर्थ तुम्ही जगायला शिकताय... हळूहळू...!

तुम्ही प्रवासाला जात असता,

भटकंती करत राहता,

तुम्ही वाचत असता सतत काहीतरी,

जगण्याच्या हाका पडत असतात तुमच्या कानावर कधीमधी,

कधी तरी देत असता तुम्ही

स्वत:च्याच पाठीवर

शाबासकीची थाप,

याचा अर्थ तुम्ही जगायला शिकताय... हळूहळू...!

स्वत:चं मन न मारता,

तडजोड न करता जगता तुम्ही,

मायेनं कुणी मदत करायला येतं,

तर तेही स्वीकारता तुम्ही,

याचा अर्थ तुम्ही जगायला शिकताय... हळूहळू...!

सवयीेंचे गुलाम बनत नाही तुम्ही,

रोज त्याच त्या मळक्या वाटेवर चालत नाही तुम्ही,

कधीमधी नव्या रस्त्यानं जाऊन पाहत असता तुम्ही,

चुकून कधी वाट चुकत असता तुम्ही,

परक्या अनोळखी माणसांना भेटत असता तुम्ही,

त्यांच्याशी हितगुज करत असता तुम्ही,

अंगावर चढवत असता नवेकोरे पूर्वी न वापरलेले रंग,

याचा अर्थ तुम्ही जगायला शिकताय... हळूहळू...!

छातीत धडधडत असतं तुमच्या,

तुमचं पॅशन काय हे सतत आठवत राहत तुम्हाला,

भावनांचा अतिरेकी कल्लोळ जाणवत असतो तुम्हाला,

आतल्या आत, तुटत असत पोटात,

येत राहत इतरांसाठी आणि स्वतःसाठीही तुमच्या डोळ्यात पाणी,

याचा अर्थ तुम्ही जगायला शिकताय... हळूहळू...!

या कामात मन रमत नाही, असं वाटलं;

तर तुम्ही चिकटून बसत नाही

त्याच नोकरीला,

नाही पटत ‘त्या’ व्यक्तीशी तर,

संपलंय प्रेम हे माहिती झालं तर,

तुम्ही रेटत नाही बसत तेचं ते जुनं नातं,

आयुष्य बदलण्याचा धोका घेऊन पाहू म्हणता,

सोडून देता तीच चाकोरी,

झपाटून झोकून देता स्वत:च्या स्वप्नांसाठी स्वत:ला,

तोलूनमापून सुरक्षित जगण्याचे सल्ले झुगारून देत,

एक संधी देऊन बघता स्वत:ला, स्वत:साठी जगण्याची...

आयुष्यचं बदलून टाकण्याची...!

याचा अर्थ तुम्ही जगायला शिकताय... हळूहळू...!

© डॉ. प्रणित उर्मिला संजय पाटील

M.B.B.S., M.D. (Community Medicine)

दि. १०/०७/२०२३.

(पाब्लो नेरुदा या नोबेल पारितोषिक विजेत्या जगप्रसिद्ध कवीची एक अनुवादीत कविता "याचा अर्थ तुम्ही मरताय... हळूहळू..." मध्ये किंचित बदल करून...)